政情：李剛笑對調任港澳辦傳聞
政圈早前有風吹，話中央分管港澳工作領導班子將有重要人事變動，盛傳國務院港澳辦主任廖暉已經敲定正式卸任，而喺政改一役中，獲中央授權挑大樑與民主派「破冰」溝通嘅中聯辦副主任李剛，更被視為接替廖暉嘅人選之一。李剛尋日出席活動時，就笑笑口話自己冇聽過有關傳言。
猶記得，政改方案喺五月爭持膠着時，李剛突然獲中央授權與民主派「破冰」溝通，多次就政改問題定調，一時間人氣急升。早前傳出佢會「更上一層樓」，由中聯辦北調港澳辦，李剛一直未作回應。尋日佢出席一個公開活動時，記者問佢有冇聽過有關傳聞，佢就笑笑口、神態自若咁話：「這是你聽說的吧？我還不知道啊！」咁如果中央有咁嘅安排，佢又願唔願意北調呢？李剛就話：「這只是『假如』。」佢既冇正面回應，亦冇作出否認，睇嚟李副主任似乎有為日後留一線喎！