政情：德育培訓開展禮名人撐場
香港青少年發展聯會轄下德育發展中心運作咗大半年，培訓計劃逐漸成熟，中心尋日推出一套切合青少年嘅德育培訓計劃，並喺鰂魚涌會址舉行開展禮。出席嘅政商界猛人雲集，包括中聯辦副主任李剛、馬會主席陳祖澤、教育局副局長陳維安、仲有由「體操王子」變身商界巨子嘅「李寧」牌創辦人李寧等。
青少年發展聯會主席陳振彬（Bunny）話，新一代青少年普遍較自我，缺乏紀律，無抗逆毅力，國民意識亦好模糊，甚至「企都企唔直」，盼透過專業培訓讓青少年體驗、反思及學習。
嚴格訓練助青少反思
今次菲律賓慘劇，正好讓青少年反思，令大家知道唔應該為個人利益不顧他人死活。課程嘅步操訓練由解放軍執教，訓練嚴格，Bunny話好多參加者都嗌辛苦，但事後好感激中心嘅教導。
德育發展中心培訓課程今年上半年已有二千人參加，較預期人數超出一倍，主要由學校組團，Bunny期望日後有更多人受惠。今次馬會捐出五百八十八萬元推動培訓計劃，為期三年。馬會主席陳祖澤好欣賞計劃，話培養青少年德育發展與馬會理念不謀而合。
