政情：黎棟國梁卓偉趁勢彈出

副局政助上任兩年表現不濟兼屢爆醜聞，但政府早前公布嘅表現同薪酬中期檢討，決定對呢十八名政治新丁一刀切凍薪，唔使為表現差劣被炒或減人工，備受各界批評。半個月後，香港旅行團喺菲律賓被挾持，菲國軍警營救人質表現，比副局政助更不堪，最終導致震驚全球嘅港人浴血菲國慘案，一系列善後工作間接畀機會兩名副局黎棟國同梁卓偉一展所長。

擁抱家屬致辭哽咽最經典

菲國慘劇發生第一晚，黎棟國臨急受命，率領多個部門人員漏夜飛往馬尼拉善後，唔止基本官方動作做齊，最令人印象深刻嘅，係佢處事成熟，慘劇當前嘅感性一面，最經典係喺馬尼拉醫院擁抱安慰已哭成淚人、遭受丈夫及兩名女兒蒙難之痛嘅梁太，而前晚死難者家屬同靈柩運抵香港，黎棟國致辭時讚揚團友堅毅勇敢面對逆境，真情流露，一度哽咽，更贏得共鳴。

卸任入境處處長兩年嘅黎棟國，去年九月出任保安局副局時，已被視為局長李少光接班人，但亦被指係退休紀律部隊首長，重返政府，有違擴大問責制以培訓政治人才原意。點知一次菲國慘劇，黎嘅人生歷練同入境處經驗，正好讓佢大派用場，總算無令人失望。

至於梁卓偉，早喺豬流感一役開始為人注意，今次發生菲國慘劇，咁啱老闆周一嶽唔喺香港，梁署理食物及衞生局局長職務。慘劇中傷者，好似頭顱受重傷嘅梁頌學同雙手被子彈打傷嘅陳國柱，佢哋返港後嘅救治工作，自然由佢統籌主理。所以梁卓偉呢兩日曝光率勁高，前晚陪煲呔曾同醫管局主席胡定旭去威院探望陳國柱，尋日同肥胡去機場迎接送返香港嘅梁頌學，又向傳媒講解梁嘅傷勢同手術安排等最新進展，對於本身係醫學教授嘅佢，可謂熟能生巧，開正佢嗰瓣。

慘案當前，本來唔應該有私心分化，不過，黎棟國同梁卓偉突然彈出，唔知其他副局政助會唔會嘆句「同人唔同命」呢？