中環耳目：黃家和最愛人情味奶茶
金百加集團主席黃家和（Simon）經營咖啡、紅茶生意，又出任香港咖啡紅茶協會主席，心目中實有一杯靚奶茶。其實Simon飲奶茶幾十年，始終都係記掛住爸爸上世紀創辦嘅上環干諾道西海安咖啡室嗰杯奶茶，覺得最有味道，加上由細飲到大，仲同班夥計感情要好，呢杯奶茶自然為佢心目中嘅No.1！
海安咖啡室向來被遊客視為本港懷舊茶餐廳代表，卓妮早前喺國際金茶王大賽上同Simon傾開，先知道原來「海安」係佢爸爸喺五十年代尾創辦，七十年代轉手畀夥計經營，時光飛逝，轉眼間已經幾十年。Simon現時間中都會返去「海安」探吓啲老夥計，例牌歎番杯少甜奶茶，再叫多件蛋撻、波蘿油或西多士，成為最佳配搭。
74歲老闆寶刀未老
當年接手「海安」嘅黃城綸，現年已經七十四歲，但寶刀未老，隨手沖出一杯靚奶茶。黃老闆話，佢沖嘅奶茶主要採用來自斯里蘭卡嘅四號茶及錦標茶，混合後再配以「黑白淡奶」，飲落味道濃啲好味啲。問黃老闆同Simon熟唔熟，黃老闆就話：「熟！由細睇到佢大啦，但最近一次嚟幫襯，已經係去年嘅事喇。」海安咖啡室經營逾半個世紀，裏裏外外難掩殘舊嘅滄桑感，但對於時下流行嘅集體回憶而言，難怪咁多市民慕名而來嘞！