政情：余錦基憶述劫機「驚」歷
出門在外，最怕人身唔安全。身兼足總董事兼香港汽車會會監余錦基同會長雲維熹，尋日出席基督教「恆信」職業訓練中心駐汽車會汽車維修中心啟動禮時，講起菲律賓槍擊事件時都心有餘悸，原來啱啱做咗阿爺兩個月嘅余錦基，八十年代初都試過坐飛機時被騎劫往台灣，當時仲係首次「三通直航」添。
余Sir話，佢搭嗰班係英航喺香港首航到北京嘅航班，點知一入咗中國國境，就畀人騎劫並挾持去台灣。無端端畀人挾持，個心又點會唔驚？不過慌忙間佢都仲冷靜盤算有咩事就即刻趴低，好彩最後都平安着陸台灣。
余Sir近排湊孫為樂，仲幫孫仔改咗個好有意思嘅名，余Sir叫錦基，有根基意思；囝囝就叫仲行，代表兩父子一齊行、接力嘅意思。至於孫仔就叫立峰，佢希望立峰做人有宗旨，能夠回饋社會，亦可以過得開心啲同舒適啲，認真係好爺爺。
至於雲維熹喺賽車界甚有名望，所以出trip都同賽車分唔開，早幾年佢去巴西睇賽車同旅遊個幾星期，因為嗰邊治安麻麻，貧富區只係一街之隔，所以特別請咗個保鏢跟身，以策安全。