政情：政黨同仇敵愾追究屠殺責任

立法會旅遊界代表謝偉俊（Paul）前日得悉慘劇發生，凌晨立即動身，跟隨特區政府出發嘅包機飛去馬尼拉。由於今次事件中嘅傷者分散喺唔同醫院，阿Paul到埗後，就疲於奔命游走各間醫院探訪傷者，向傷者家屬送上最直接嘅慰問。稍為遲一步出發去馬尼拉嘅社民連前主席黃毓民，尋日亦坐八點鐘飛機出發，佢抵達馬尼拉之後分別陪伴領隊嘅父母舉行路祭外，又接觸咗前日得以獲救嘅李氏夫婦。

留喺香港嘅其他黨派亦未有怠慢，自由黨副主席張宇人前日第一時間發出新聞稿，對事件表示震驚同難過，並要求菲律賓當局為事件解釋；身在北京列席全國人大常委會會議嘅自由黨常委田北辰，亦喺會上要求中央政府向菲律賓政府作出強烈譴責及跟進事件，並獲得席上常委贊成。該黨昨日亦有派成員到菲律賓駐港總領事館抗議。

經濟動力林健鋒尋日下晝兩點半，就同旅議會總幹事董耀中，與菲律賓駐港總領事柯明會面，對事件表示遺憾，並對菲警處理手法極度失望，要求菲律賓當局對事件追究到底，將結果向公眾交代。

C18登廣告譴責菲政府

由「五散人」林大輝牽頭嘅C18，今日更會喺本報刊登全版廣告，譴責菲律賓政府，今早又會喺尖沙咀碼頭收集市民簽名，聯署要求菲律賓政府還死傷者一個公道，並促請佢哋向死傷者作出補償！大輝狠批菲警嘅救人行動極度草率，佢哋嘅強攻儼如謀殺行動，令更多香港人無辜枉死；佢譴責菲律賓總統聲言自己親自處理事件，卻處理得如此不堪，直頭係草菅人命！

民主黨同民建聯兩個大黨尋日亦去咗菲律賓駐港總領事館抗議，為死傷者默哀。立法會保安事務委員會都決定聽日下晝四點半召開特別會議，跟進事件。

喺今次屠殺事件中，由菲律賓政府高層以至菲警嘅處理手法，都備受千夫所指。面對今次慘劇，都係立法會不同黨派團結一致、槍口對外嘅時候，為無辜死去嘅港人討回一個公道！