垃圾屋氾濫房署束手
房屋署對垃圾屋束手無策，受滋擾鄰居慘成犧牲品！分別有多個屋邨居民向本報反映，指有鄰居經常拾荒回家，單位內的垃圾長年堆積如山，不但臭氣熏天，孳生的蟲蟻更加波及全層，即使多次向房署投訴仍不得要領。關注團體直斥房署處事有欠積極，促各部門加強配合，徹底解決問題。
居於啟業邨的連先生近年飽受臭氣侵襲，居無寧日，「隔籬屋成日搬啲垃圾返嚟，一有風吹就臭到頂唔順，成層都有臭味！」連與家人為免受臭氣滋擾，即使酷熱天氣下仍要被迫長期緊閉門窗。連曾多番向房署投訴，但房署只派人為拾荒戶清理雜物，治標不治本，「呢頭清完嗰頭就執返嚟，邊有用吖！」
連指房署職員亦承認無法解決問題，只能建議透過調遷「避之則吉」，並通知社署介入，「我哋搬走咗，下一手乜都唔知入嚟住，唔通又叫人搬？」由於至今仍未有社署人員介入事件，質疑遭房署敷衍。
無獨有偶，石硤尾邨亦乍現「垃圾屋」。曾小姐指鄰居有收集垃圾嗜好，令單位孳生大量蟲蟻，「呢排連佢自己都頂唔順要噴殺蟲水，搞到啲曱甴就走晒出嚟，成條走廊都係！」曾屢向房署投訴不果，坦言已不存寄望。另一名受害人黃先生則居於藍田德田邨長者屋，其中一名室友經常拾取大量舊衣物並在房內囤積，「佢張床好多衫褲，連女裝都有，好明顯係佢執返嚟。房署淨係上嚟清過幾次，根本冇用！」
管理公司被斥卸責講大話
房署發言人表示，處理拾荒家庭堆積垃圾引起滋擾問題時，會先發出口頭警告，並要求住戶在合理期限內改善，否則將被扣分。就啟業邨個案，由於住戶年紀老邁，未能處理雜物及過期食物引致，房署將與社署聯手跟進，至於石硤尾的住戶已被扣分處理。不過，負責管理德田長者屋的物業管理公司發言人則稱，過去並未有接獲任何相關投訴，查察後亦未有發現有垃圾囤積。
「佢哋分明講大話，我同房署投訴咗好多次，同管理公司都投訴咗兩次！」黃先生直斥德田邨管理公司推卸責任，亦不滿房署外判管理工作後對住戶置諸不理。
立法會房屋事務委員會主席王國興認為，屋邨衞生事務牽連甚廣，房署應主動介入協調，「唔係要等到傳媒出聲先做嘢，更加唔應該將責任推畀管理公司！」王亦指現有扣分制並非解決拾荒戶的唯一方法，面對住戶或涉不同背景及問題，房署應加強支援，協調各個部門提供適當協助。
記者 林永發