政情：潘潔唸口黃回應凍薪

十八個副局長同政治助理表現不濟兼屢爆醜聞，理應減人工甚至炒魷，但政府公布其表現及薪酬中期檢討，只對十八人一刀切凍薪，個個唔使減薪。環境局副局長潘潔喺報告出街當日出席港區婦聯代表聯誼會晚會時，以背書方式回應凍薪感受，拋低咗十六個字：「細心聆聽，努力工作，盡心盡力，服務市民。」政治任命官員唔單止要識得推銷政策，更要識得推銷自己，潘潔背書回應凍薪，毫無人情味，睇嚟佢嘅政治公關技巧仲有待改善。