政情：怪醫立會對面開檔
因為同醫院管理局打官司一鳴驚人嘅立法會醫學界議員梁家騮，將離開佢做咗廿四年嘅威爾斯親王醫院，今年十月同大佢三年嘅哥哥、私家骨科醫生梁家騏喺中環太子大廈開診，兩兄弟拍檔搵食。佢話揀喺太子大廈開檔，係因為喺正立法會對面，去立法會連馬路都唔使過。唔通怪醫諗住兩年後嘅立法會選舉贏梗？
本身係外科醫生嘅梁家騮話，唔單止公立醫院病人輪候手術，公立醫院醫生都要輪候手術室做嘢，所以希望喺私營市場做多啲手術。
兩兄弟間診所近一千呎，裝修費閒閒哋都要四、五十萬元，佢相信喺醫管局筆公積金足夠支付開業費。唔少外科醫生由公立醫院出嚟私人執業，月入過百萬元，甚至一星期賺一百萬元，成為「月球人」、「星球人」，怪醫就話佢無咁樂觀喎。
醫生私人執業皮費唔輕，所以怪醫至要搵哥哥幫手，分擔吓啲燈油火蠟。怪醫八六年喺中大醫學院畢業，佢哥哥梁家騏八三年畢業於港大醫學院，三年前私人執業，依家喺一個醫療集團工作，諗住空餘時間喺細佬間診所助陣。