政情：媽打捐出70萬長俸
有「眾人媽打」之稱嘅前民政事務局常秘李麗娟，向來熱心公益已係不爭事實，仲有個「例捐」嘅花名。不過原來媽打做善事唔只「撲水」咁簡單，去年佢仲將佢成年超過七十萬嘅長俸全數捐去畀多個慈善團體添。媽打嘅長俸每個月有成六萬幾，全數將佢捐出，真係冇乜人做得到！
媽打解釋話，自己早年身體唔好，成日做手術，曾經同自己講過，如果有六十歲命，一定會喺嗰一年捐晒啲收入幫人，如今佢身壯力健，一定要兌現承諾先至安樂。佢又話退休後比做官時更忙，去年搞咗十幾項籌款活動，依家又總共幫緊成十幾個慈善團體籌款，仲自爆有唔少想做善事嘅商界朋友都主動搵佢幫手，因大家都知佢最熟門路，知點樣先幫到人喎。
講開商界，咁前自由黨主席田北俊又有冇搵媽打幫手做佢搞緊嘅扶貧基金呢？田少話明要搵前高官幫手，媽打話佢同田少好老友，如果佢叫到嘅一定好樂意幫手，不過現時個「扶貧基金」未成形，田少仲未正式同佢開聲喎。