政情：呂新華背後女人唔易做
唔經唔覺，外交部駐港特派專員呂新華喺香港工作已經四年，最近佢接受電台訪問時笑言，做佢老婆一啲都唔容易㗎！事關佢經常因工作關係走來走去，足迹遍布全球一百五十幾個國家，作為跟得夫人自然要跟住佢四圍走啦，仲要同唔同國家領事夫人打交道添！
○六年上任做駐港特派專員嘅呂新華早前接受電台訪問，佢話專員呢個位嘅任期一般都係三至四年，但係因為佢六十歲都未到，故此任期會比前人長一啲，亦相信係至今做得最耐嗰位，佢話即使做到退休都願意。其實呂新華明年就足六十歲，問佢會留喺呢個崗位做到幾時，呂新華就好謹慎咁話，呢樣嘢就要睇國家安排啦，果然政治正確！
講到佢太太張靜婭，呂新華有讚無彈。佢話自己多年嚟派駐過唔同國家，佢太太自然陪住佢周遊列國，而且要出席各種宴會，同其他國家領事夫人打交道，所以呢個特派專員夫人一啲都唔易做！