政情：兩個KK坐「雙飛」高鐵

工聯會啱啱喺十三日至十五日搞咗個湖南高鐵團，由會長鄭耀棠任團長，邀請廣東社團總會高層王國強、陳強同楊志紅做榮譽團長，中聯辦主任彭清華任榮譽顧問，工聯核心如黃國健、王國興同理事長吳秋北都有同行，加上會員連家屬共一千人。據聞湖南當地政府官員忍唔住對佢哋講，從未試過接待咁大陣容嘅民間訪問團。

難忘千人包廂

湖南最出名嘅兩樣嘢，好似以辛辣著稱嘅菜式同毛澤東故居咁，訪問團都無放過，不過兩位KK不約而同話，最難忘都係包廂坐高鐵。由於團員成千人，一列八卡高鐵根本坐唔晒，於是鐵路部作出破天荒安排，喺一列高鐵後面再扣多一列高鐵，兩架高鐵一齊極速滑行，夠晒特別。