政情：經濟動力分兩腿殺入區會

○八年由「4L」退出自由黨後自立門戶嘅經濟動力，現時有四個區議員，包括「4L」中嘅「新界王」劉皇發、郭振華、羅煌楓同李漢城，後二人係委任議員。Jeffrey尋日同傳媒聚會時，唔肯透露明年出戰人選同攻打選區，對外界揣測會羅致理念相近嘅沙田區議員龐愛蘭加盟，佢更加不置可否，大賣關子。

4L個個係生意人，數口最精，大打區議會選舉算盤，當然有數得計。一二年特首選舉，負責投票嘅一千二百人選舉委員會，其中民選區議員增加到一百一十七席，經濟動力若能開拓區議會版圖，政治能量自然水漲船高。

暗寸田少搞扶貧

經濟動力攻打區議會算盤打唔打得響，明年底先有答案。不過，4L要同其他玩開直選嘅政黨一較高下，決心呼之欲出。好似Jeffrey講仇富問題，話香港人其實愛富求富，對弱勢社群，工商界一直想搞扶貧基金，但佢唔同意由政黨中人嚟搞，因為會令事件政治化。呢句話矛頭直指近期傳出幫「大孖沙」籌備商界扶貧基金嘅自由黨前主席田北俊。

以工商界起家嘅自由黨，近年全力開拓直選市場，○八年敗走直選戰場後，「田二少」田北辰接棒，繼續堅持進軍直選。即係話，同經濟動力一樣行兩條腿走路政策，而且同係工商界背景，對比性太強，Jeffrey暗批田少，絕非無的放矢。

尋日Jeffrey同Andrew連其他平日無乜牙齒印嘅政黨都明批暗諷一番，你一言，我一語咁唱雙簧。好似提起經濟動力嘅區選攻勢嗰陣，就強調唔會靠派糉攞選票，暗寸專走街坊路線嘅基層政黨；又指民主黨主席何俊仁掛名做民主黨嘅工商政策發言人，但「鐵頭仁」對中小企唔熟，如何有代表性呀？至於公民黨黨魁余若薇要求將實習生納入最低工資規管範圍，就話變相鼓勵僱主以後唔請實習生啫。嘩，區會選戰未開波，經濟動力已經四圍點火頭，果然一副戰鬥格！