中環耳目：餐飲奇才齊撐伍得良新作
喺飲食界輩分好高嘅香港餐飲聯業協會創會會長伍得良，夥拍高思文走訪本港廿二位飲食界巨子，兩人合著《餐飲與人生‧我眼中的餐飲奇才》一書，尋日舉行新書發布簽名會，多名飲食界重量級人物捧場，良哥開心到笑不攏嘴。
患柏金遜症清瘦
一眾嘉賓之中，以有家族官司在身嘅鏞記酒家董事總經理甘健成最有心，即使同細佬嘅清盤官司仲未了結，都抽身同囝囝甘崇轅撐足全場。卓妮問佢官司進展，佢好客氣話唔講啦！見佢笑口盈盈，睇嚟家事並冇影響到佢嘅心情。其他嘉賓仲有翠華餐廳集團主席李遠康、蛋撻王董事總經理莊裕坤、煌府婚宴集團主席陳首銘等。
好耐冇蒲頭嘅良哥，由於患上初期嘅柏金遜症，成個人清瘦晒，但仍然好精神，見到咁多老友嚟支持，顯得好開心。原來佢今年啱啱做咗英國侯城大學MBA商管碩士，六十九歲都堅持終身學習，良哥嘅精神感染咗一眾嘉賓，個個都話相形見絀。