中環出更：華仔謙稱球技不及朱鼎耀
每次見到觀瀾湖球會主席朱樹豪嘅二公子朱鼎耀（Tenniel），話題總離不開高爾夫球。早前一個星期三下午，紅黃黑雨一齊嚟，但朱都專程喺深圳返嚟香港出席一個高球頒獎禮，仲撞到老友任達華，原來兩個做咗波友多年，經常一齊打波，遇正有慈善賽的話，好多時仲會做埋拍檔一齊打添。不過最fit打八十二桿嘅華仔，就謙稱比唔上打到七十三桿嘅Tenniel。
華仔依家忙緊拍一部笑片，佢話工作忙碌，唔得閒成日去觀瀾湖打波，仲講笑叫Tenniel返嚟香港搵地方起球場。Tenniel話都可以考慮吓，事關高球喺中港兩地都有好大潛力，依家打波人數每年增加五成，估計十年後會超過二千萬人，加上又係奧運項目，所以呢項運動推動得好快。
咁有潛力，難怪觀瀾湖兩年前就喺海口搵地方起球場，嚟緊十月仲會搞場大型職業明星賽，到時曉治格蘭、嘉芙蓮鍾絲、馬修麥康納等多位荷里活明星，仲有「飛魚」飛爾普斯、體操王子李寧等國際級運動員都會嚟，當然唔少得任達華啦，連中央電視台都會轉播。Tenniel話個球賽細節已安排得七七八八，到時爸爸都會嚟湊熱鬧。