中環出更：伍穎梅拖手仔唔認拍拖
人稱「九巴金公主」嘅九巴後人伍穎梅（Winnie）係城中少有嘅單身女貴族，Winnie瞓身工作，甚少談及感情生活，身邊朋友都替佢着急。估唔到，愛神已悄悄降臨Winnie身上，尋晚佢相約一位男士喺置地Cafe Landmark談心，全程「手疊手」，拖足粒半鐘唔放手。畀卓妮撞到正，Winnie尷尬面紅，唔認對方係男友喎。
拖足粒半鐘唔放手
身為路訊通控股創辦人及副主席嘅Winnie，對感情事一直三緘其口。今年初接受訪問時，話冇刻意抱獨身主義，「依然等待愛情」；話口未完，就遇到令佢心跳嘅男士。
面貼面睇相勁癡纏
尋晚六點，卓妮見到Winnie同一位身形健壯嘅男士喺置地Cafe Landmark飲嘢。甫坐低，男方就忍唔住將手疊喺Winnie手背上，咁溫柔，女方亦報以含情脈脈嘅笑容，相當陶醉。男方一言一語都逗得Winnie哈哈大笑，情到濃時，兩人禁不住拖手仔，一拖就放唔到手，除咗攞起水杯嘅時間，完全無意鬆手。男方對Winnie嗒晒糖，索性攞出iPhone拍下佢嘅倩影，兩人面貼面一齊欣賞「作品」，癡纏到極！
個半小時後，兩人埋單轉場去食晚飯。卓妮上前打招呼，問Winnie係咪拍拖？佢尷尬地話：「唔係呀！」似乎想保護呢段甜蜜嘅戀情。
男方似乎對鏡頭非常敏感，見卓妮舉機，即時彈開五、六個身位，並以手遮面，Winnie護「草」心切話：「唔好（影）喇，遲啲先！」定過神後，兩人又迅速「合體」，十指緊扣會合朋友共進燭光晚餐。睇嚟Winnie好事近喇！
卓妮