政情：朱沛坤自爆留鬚改運
香港工程師學會新任會長朱沛坤留咗二撇雞，十分易認，佢尋日同傳媒聚會時主動自揭留鬚之謎。話說當年朱會長大學畢業後，加入了一間工程公司，佢一心打算盡快考取註冊土木工程師牌照，方便日後更上一層樓，不過，間公司遲遲都唔派佢到地盤做嘢，令佢難以符合考取牌照嘅基本規定。朱會長向公司查問原委，點知佢上司同佢講：「就係因為你做得嘢，所以更加要留喺公司度做嘢。」令當時年紀輕輕嘅佢好不滿。
朱會長話當年人浮於事，不敢輕言「唔撈」，佢自覺十分運滯，於是決定留鬚改運，並膽粗粗報考自己並不擅長但毋須地盤經驗嘅另一工程師牌照，點知佢考試當日竟遇上考牌「殺手」，專考學生唔熟嘅範疇，就係咁，出題正好係佢嘅強項土木工程，結果畀佢輕易取得佳績。自此朱會長深信鬍鬚帶畀佢好運，於是一直留鬚至今。
朱會長又話，十大基建陸續展開，今年畢業嘅工程系學生幾乎全部有工做，佢希望政府可將十大基建攤勻推出，令未來畢業嘅學生都有工做。