政情：何鍾泰搵定接班人？

最近有傳聞話，到咗二○一二年就七十三歲嘅立法會工程界議員何鍾泰下屆唔再參選，何鍾泰尋日話，下屆選唔選就言之尚早，但佢亦覺得剛退休嘅前建築署工程師嚴建平都係理想嘅接任人選，事關嚴建平喺業界都有啲聲望喎﹗今年五十五歲嘅嚴建平，依家做緊由何鍾泰擔任主席嘅工程界社促會高級副主席，的確令人聯想到有交棒嘅含意。

咁啱尋日學會同傳媒聚會，我哋又再打聽一下，原來政治中立嘅學會，亦認為人選非常難搵，太年輕嘅未必壓得住場，得到業界支持，但有番咁上下資歷嘅，又對政治呢個熱廚房無乜興趣。

對於何鍾泰推介嘅嚴建平，知情者話雖然佢喺政府做咗三十幾年，但係業界又未必一面倒支持喎！咁會唔會最後都係由何鍾泰勉為其難出番嚟選呢？知情者話依家仲係言之尚早。其實○八年一役中，何鍾泰嘅主要對手公民黨黎廣德，一共攞到二千五百幾票，只係以一百九十三票之差輸畀何鍾泰，所以一二年選舉，何鍾泰都好難諗。