政情：田少嘆扶貧基金惡搞
旅遊發展局主席田北俊早前話要搞個扶貧基金，但就一直未有新嘅公布，田少尋日出席活動時，否認計劃胎死腹中，強調件事一直都進行緊，不過佢都忍唔住慨嘆，「慈善企業唔係易做㗎，我哋都冇呢啲經驗。」
澄清無胎死腹中
田少尋日出席旅發局活動，畀人問起搞扶貧基金嘅事，本來話只講旅遊嘢，不過一聽到話有基金胎死腹中嘅傳聞，都忍唔住講番幾句。佢話不嬲都話個基金要年底先成立，不過佢都提到一啲新構想嘅，就係畀個別公司負責個別項目，因為有啲財團不嬲自己都有搞緊慈善項目。至於商會，田少話商會喺政策上畀意見、捐錢就得，至於籌劃點樣做慈善︰「佢哋都唔係做呢啲嘢嘅。」
田少又話，點樣搵對象，同埋用咩渠道去幫人就要詳細啲、小心啲處理嘞，費事好似幫到好多人，但其實每人分到嘅錢好少，啲錢就唔知用嚟做乜喎。
估唔到有心做善事，搞起上嚟一啲都唔容易。