政情：鐵頭仁袋巾傑勢割席

該名核心成員指出，民主黨同公民黨依家嘅關係，與○七年袋巾傑參選特首時已經完全唔同晒，但如果佢哋搵唔到一個堂而皇之嘅理由杯葛對方，肯定會畀人反咬佢哋小器記仇兼破壞泛民團結，最兩全其美嘅做法，就係由該黨直接派人參選，咁就有大條道理唔畀票袋巾傑；若果到時公民黨要求舉行初選，協調單一泛民候選人出戰，民主黨亦唔會怕同袋巾傑正面對撼。

後悔○七年幫公民黨抬轎

另一名民主黨核心成員亦指出，○七年佢哋支持咗袋巾傑參選特首，令對方以至整個公民黨都人氣急升，事後唔少黨員都後悔呻笨，認為係長他人志氣，滅自己威風。下屆特首選舉預計喺一二年三月舉行，與同年九月舉行嘅立法會換屆選舉非常接近，該黨直接派人選特首，對該名參選人以至其他黨友喺立會選舉嘅表現亦會大有幫助，因此在情在理民主黨都應該派人參選。

人選方面，鐵頭仁同○五年參加過特首補選嘅李永達都係考慮之列。其中鐵頭仁經過政改一役後，喺黨內黨外都人氣急升，連中央都覺得佢係理性務實同有誠信嘅談判對手，多名核心成員就力撐佢打破民主黨主席只可連任一屆嘅不成文規定，喺今年底嘅黨高層換屆選舉中繼續留低，打埋一一年區議會同一二年立法會兩場選戰先至圓滿卸任。

至於喺加盟民主黨之前講過好想退休嘅劉慧卿，據聞亦好大機會會再戰多一屆立會同冧莊副主席。另一退意已決嘅李華明，亦有人提議佢重新考慮參選九龍東，排喺第二梯隊胡志偉參選名單嘅第二位力爭兩席，希望可砌低同區嘅袋巾傑或社民連主席陶君行，進一步封殺公社兩黨。