中環耳目：橋牌賽奪冠蔡志忠牙擦有理

聶衛平無興趣移居香港

打咗三十一年橋牌嘅蔡志忠賽後牙擦擦，話贏得唔辛苦，更大晒戰績：「我至今攞咗一百二十一個橋牌賽冠軍及亞軍，但我唔鍾意攞亞軍，多數都攞冠軍。」尋日蔡氏獎牌榜上，又增添一面金牌，抵佢牙擦。

聶衛平嘅「牌齡」短啲，只有十年，舊年佢冇參賽，今年一出場就捧盃。卓妮問佢會否移民來港大展拳腳，聶生頭擰擰話：「我冇興趣，你千祈唔好寫我想移民嚟香港呀。」難怪當卓妮講起政府有個輸入內地優才計劃，佢顯得茫無頭緒，話冇聽過喎。

吉利汽車控股有限公司行政總裁桂生悅前晚都嚟打牌，原來佢玩咗橋牌十年，去年仲係呢個比賽香港公開組冠軍添，佢笑言，打橋牌有助鍛煉腦筋，對做生意有幫助喎。