曾經被喻為「特首御醫」嘅港大醫學院前院長林兆鑫服刑不足一年閃電出獄，獲准喺受監管下外出工作，令各界嘩然。卓妮尋日遇到有泌尿科聖手外號嘅行政會議成員梁智鴻（金刀梁），問佢知唔知林兆鑫出獄消息，佢就話睇報道先至知，仲未有機會見面，等佢安定落嚟再算。金刀梁又話，作為林兆鑫嘅好朋友，都希望佢出獄後可以再度融入社會；至於係咪支持佢再做醫生，金刀梁就話無意見，全部要交由醫務委員會決定。
（葉華英攝）
