中環出更：張宇人樂做 跟得先生
陪女人行街，唔少男人聽見都怕怕，立法會飲食界代表張宇人（Tommy）就非常享受。陪太太一次過橫掃三間名店。太太揀嘢時，佢靜靜坐埋一邊玩手機打發時間，夫妻相處之道，原來就係咁簡單。
拍拖行名店
Tommy向來錫老婆，前日傍晚，卓妮見佢搭住太太膊頭行ifc，先去三樓連卡佛睇鞋。置身鞋海中，張太樂在其中，試完一對又一對，Tommy就無所事事，搵個靚位坐低，然後攞部手機出嚟check電郵，好彩太太打咗個「白鴿轉」就走人。
兩人又再手牽手行落二樓名店Cole Haan睇鞋，呢個美國時尚名牌以生產經典美式平底船鞋聞名，Tommy似乎有啲興趣，陪太太「巡視」一番，張太攞起一對平底鞋問老公意見，Tommy就笑瞇瞇回應。可惜呢趟都係睇唔啱，張太示意再「轉場」，Tommy一於奉陪到底，陪太太步入同層嘅Kate Spade睇手袋。
原來兩口子睇中一個有蝴蝶結嘅黑色布袋，張太睇睇價錢，盛惠三千六百元，望咗一輪都係放低唔買。離開舖頭時，Tommy撞見卓妮上前，大方地打招呼。張太話，本來想買個容量較大嘅「奶粉袋」，送畀生完BB嘅囡囡，但略嫌價錢貴咗啲，都係諗真啲先！
美國名牌Kate Spade憑設計簡單嘅手袋震撼傳統手袋市場，呢個牌子風格調皮、精緻，帶強烈個人風格及繽紛色彩，營造開心淑女形象。
卓妮