政情：叻女識做 阿人冧晒
立法會一班代表勞工界嘅議員，早前為最低工資立法連續通頂開會，其他議員可以安心離港放暑假，佢哋就要被迫留港，為即將公布嘅首個法定最低工資水平備戰。不過辛苦係有回報嘅，來自職工盟嘅李卓人早前就收到fans送上一個花籃打氣，更開心嘅係，佢個9A狀元乖女李適之仲專程去咗立法會，幫爸爸抬花籃，一齊分享呢份喜悅。
適之喺瑪利諾修院學校讀中學，○八年會考做咗9A女狀元後，原本諗過「拔尖」報讀中大新聞與傳播學課程，但最後都係決定改到美國紐約大學修讀傳理系，開吓自己嘅眼界。適之去到學習環境與香港好唔同嘅美國，成績依然出類拔萃，首年取得GPA最高點數4.0，即相等於九十一至一百分嘅Ａ級，證實佢唔係只識死讀書。
適之最近放暑假返咗嚟香港實習，於是就約埋啱啱喺立法會開完會嘅爸爸一齊去食晚飯，順便幫手攞埋個花籃返屋企。阿人話囡囡讀書咁叻，已經係對佢嘅最大回報。