政情：高永文講古囝囝撐場
骨科名醫高永文平時極少同家人出席公開活動，但尋日佢應邀到書展同小朋友講故事，大仔高偉琛及細仔高樂琛就罕有孖住去撐場。偉琛現時就讀港大醫學院三年級，而樂琛就喺英國讀生物化學，一門雙傑，原來兩兄弟細個都好少聽到高醫生講故事，如今爸爸公開講述南丁格爾嘅奮鬥故事，當然要捧場啦！
高醫生早前同太太及兩個囝囝去咗日本東京旅遊，雖然暑假仲有成個月，但佢唔打算再去第二個行程嘞。偉琛自言想留喺香港Hea吓，去到邊食到邊。問偉琛會否學爸爸做骨科醫生，佢話目前仲諗緊，而樂琛就話乜都未諗。
高醫生尋日講完故事之後，再帶埋兩個仔去撐自己嘅契仔、經歷八仙嶺山火慘劇重生嘅張潤衡嘅新書簽名會。張潤衡嘅契媽前高官李麗娟亦有撐場。據講張潤衡早前喺美國同拍拖多年嘅女友Rainbow拉埋天窗，計劃稍後到香港教育學院修讀生命與教育博士課程，高醫生同媽打當然話會全力支持。