政情：季詩傑暗戰任亮憲？
社民連成員「維園阿哥」任亮憲被勸退參選南區區議會補選，令佢同社民連秘書長季詩傑有心病嘅傳聞甚囂塵上。尋日佢兩個前後腳出席同一項活動，起初全無交流，疑似面左左，最後喺傳媒要求下，先至懶老友咁一齊合照。不過睇番佢哋講嗰啲嘢，就令人質疑佢哋只係扮冇心病。
維園阿哥笑笑口話佢無同任何人有心病，其他人就唔知啦！又自言可能係入黨日子尚淺，就膽粗粗走去參選社民連行政委員會，因而令某啲人有微言。佢話一旦當選行委，一定會加強黨內溝通。
至於被指因為同樣有意喺港島區出選，而暗中發功想踢走任亮憲嘅季詩傑，尋日就話維園阿哥的確對捕捉時事問題非常快手，但問題係有時把口快過個腦，再者對方人氣咁高，講完啲嘢會令人以為係代表成個黨嘅立場。即係話維園阿哥講嘢唔經大腦，扮大佬唔跟黨立場發言喇？要令人相信佢哋冇心病真係好難。