政情：「小強」踩場 CY難安心
行政會議召集人梁振英（CY）尋日現身書展，出席佢中學師兄前天文台台長林超英（黑英）嘅新書宣傳活動，本來呢個「雙英會」噱頭十足，可惜由於CY講嘢太行貨，加上中途殺出咗一隻「小強」（蟑螂），搶晒成個雙英會嘅風頭。
黑英本新書叫做《天地變．何處安心》，但宣傳活動途中，一隻估計有兩、三吋長嘅「小強」突然喺「雙英」背後嘅布景板出現，仲好似做時裝表演咁，前前後後上上下下來回爬咗幾轉，現場工作人員又好似睇唔到咁冇出手解決咗佢，搞到平日表現穩重嘅CY，多次忍唔住回頭
吓隻「小強」爬到去邊，襯晒本書嘅主題「何處安心」。反觀黑英就處變不驚，明知後面有隻「小強」搞搞震，都冇分到神影響自己嘅演講。
天文台其中一項主要工作係就惡劣天氣警告市民，黑英坦言佢為咗令到啲市民開心啲，不時會諗啲聽落詭辯嘅警告同講解方法，仲話「呢個世界靠詭辯，好多嘢講講吓就通」。令人諗起○八年颱風鸚鵡襲港時，佢對「清晨」一詞嘅解說。不過當問及天文台喺日前黑雨特大水浸嘅表現，佢就唔敢「詭辯」，只係話唔會評論佢班舊兄弟嘅工作。