政情：新大樓揀位泛民好難夾

不過各大小政團、尤其泛民主派要湊夠十五個人肯定坐埋一齊，認真唔容易。須知「五區公投」同政改表決令泛民內訌加劇，尤其係多次公開互插嘅民主黨同社民連，要佢哋閂埋門喺同一層樓做鄰居，成日行出行入面左左，當然係冇可能啦。

大家咪以為剩係呢兩個黨唔肯坐埋一齊，七位無黨派同「一人黨」泛民議員，亦同樣要求多多，嫌三嫌四。其中職工盟李卓人、街工梁耀忠、民協馮檢基、社總張國柱、公民起動何秀蘭、同退出咗民主黨嘅鄭家富，好不容易先協議到坐埋一齊，但另一泛民「散件」衞生服務界李國麟就死都唔肯制，唔知係咪同佢喺最低工資問題上畀李卓人公開鬧爆有關。

再者純粹以數學計算，該六名散件泛民理應同有八名議員嘅民主黨坐埋一齊，但據聞當中又有部分人唔想，亦擔心根據多人揀先嘅原則，將來啲靚位會畀民主黨揀晒。最後民主黨唯一改為夥拍有五名議員嘅公民黨，另加一至兩名建制派議員為鄰。

社民連處境最惡劣

至於社民連嘅處境就更加惡劣，不過就唔係擔心佢哋喺辦事處都會掟蕉掃枱，而因為該黨成日邀請埋啲唔知咩人上辦事處，有啲仲畀人揭發過違例煲煙，令個個政團都唔想黐埋去。

聽聞秘書處建議搵啲政治色彩冇咁濃厚嘅建制派政團與社民連同層，希望大家反彈冇咁大。畀秘書處Mark中嘅包括五散人、專業會議同自由黨，夾埋社民連三子啱啱好十五人。社民連就話同建制派為鄰，都好過成日同民主黨面左左，又預告佢哋未必控制到自己，唔排除行出行入都會鬧爆班建制派嘅功能界別議員。最後該三個政團會唔會因為驚咗社民連而打退堂鼓，依家仲係未知之數。

講到揀位，今次就以擁有十名議員嘅民建聯最精，晨早就搵埋工聯會四子同中總代表黃宜弘，十五個人根正苗紅獨霸一層，一定唔會夾到社民連，將來一齊討論選舉機密同聲討泛民大計時，亦冇咁容易畀對方偷聽。