中環出更：發叔倡建大型龕場有先見
本港骨灰龕長期嚴重短缺，港府到最近先建議十八區每區都要興建骨灰龕，但反對之聲不絕於耳。原來早喺七十年代，鄉議局主席劉皇發已經先知先覺預見到呢個問題。
發叔形容骨灰龕就好似垃圾站一樣，人人都需要用，但人人都唔想設喺自己門口，所以佢一直本着「先正己，後正人」嘅精神，於三十多年前提出喺屯門興建大型骨灰龕，以應付未來需求。
70年代獲批惜爛尾
發叔尋日為馬灣鄉事委員會新大樓奠基儀式主禮，問及政府力推在各區興建骨灰龕，佢憶起自己早喺七、八十年代做博愛醫院主席及仁愛堂主席時，先後兩次向政府提議喺屯門興建骨灰龕，並獲當時嘅政府批准，但後來因為種種原因未能成事。即使到依家，發叔仍然堅持要興建大型骨灰龕解決需求，所以近年鄉議局就提出有關計劃。
發叔話，鄉議局熟悉民情和鄉情，喺協調和統籌工作方面有經驗，如果搞得好嘅，自然無反對聲音，講得有道理嘅，啲人自然會聽你講，希望政府考慮吓佢哋嘅建議。尋日個奠基儀式喺戶外舉行，烈日當空、曬到飛起，大會為咗唔想發叔致辭時曬得咁辛苦，特登搵專人為佢擔遮擋太陽，認真架勢。其實發叔咁遠水路去撐馬灣鄉委會主席陳崇業，相當畀面，唔怪得發叔喺鄉郊有咁多人支持啦！