中環出更：扮嘢文3D易容玩轉哈囉喂
海洋公園喺嚟緊九月推出哈囉喂十周年，硬撼香港迪士尼樂園五周年，大家都將焦點集中喺外號「扮嘢文」嘅海洋公園主席盛智文身上，過去多年佢分別扮過鬼新娘、殭屍、甚至連中國紙紮公仔都夠膽扮，今年又會扮乜鬼呢？海洋公園尋日就放咗少少料，透露扮嘢文今年將挑戰3D特技易容化妝，倒模物料由頭淋到落頸，真係乜鬼都敢試。
倒模過程 感覺恐怖
呢個終極3D特技易容化妝，第一個步驟就係倒模。扮嘢文告知卓妮，早排有技術人員為佢倒模，由頭到頸都淋上白色倒模物料，過程足足四十五分鐘，真係好鬼驚。佢話：「成塊面被嘢冚住晒，得番兩個鼻窿抖氣十分困難，其實都幾恐怖，惟有諗吓其他嘢打發時間，好似蘭桂坊呀、布吉島啲生意同埋海洋公園，希望快啲搞掂。」
扮嘢文咁辛苦倒個模究竟為乜呢？原來將石膏或水泥注入倒模內，就可以複製出同扮嘢文一模一樣嘅塑像，化妝師之後再利用塑像，為佢創造全新造型，甚至可以易容或改變面貌特徵添！不過，講到尾扮嘢文扮乜鬼始終係個謎，點都要賣個關子嘅，究竟易容後有幾驚嚇，大家就拭目以待喇。
扮嘢文矢言，今年哈囉喂係歷來最大規模，八間鬼屋會加入最新科技元素，包保大家嚇餐死。聽聞扮嘢文會做其中一間鬼屋嘅屋主，唔知到時會否用呢啲塑像搞鬼嚇人呢？
卓妮