政情：蔡瑩璧講錯局名鬧笑話
商務及經濟發展局常任秘書長蔡瑩璧（Yvonne）尋日鬧咗個小笑話，佢喺立法會工商事務委員會匯報港台經貿合作平台最新情況時，兩次將主力搞港台互動嘅「政制及內地事務局」，講錯做「內地及政制事務局」，好彩政制及內地事務局局長林瑞麟唔在座，如果唔係，佢一定好傷心。
「政制及內地事務局」前身係叫「政制事務局」，回歸之後，內地事務重要咗，所以清清楚楚將有關嘅工作歸政制事務局負責，不過如果將內地事務擺喺政制之前，畀大眾嘅觀感就好唔同。唔知Yvonne係咪覺得內地事務重要過政制呢？
其實港府政策局○七年改組後，唔少政界人士都難以改口，好似早前專業會議議員梁美芬提出緊急質詢時，就將食物及衞生局寫錯做其前身衞生及福利局，好多人開始見怪不怪。Yvonne今年年尾就正式退休前休假，唔知佢會唔會喺卸任之前，記番啱個名呢？