民主黨過往曾發生多次洩密事件，有啲仲係自己友所為，尋日就又爆出一單，將該黨一份本應傳真畀黨團召集人李華明嘅文件，傳咗畀傳媒。不過經過一輪查證之後，原來今次只係該黨一位職員唔小心㩒錯掣所致，唔係又畀人「滲透」或者再次出現「真兄弟」。
肥仔明將於今日舉行記者會總結該黨立法會議員過去一年嘅工作，包括提過幾多項動議同質詢，參加咗幾多個會，出席率有幾高等。民主黨秘書處尋日原定將有關統計同新聞稿，傳真畀肥仔明睇吓，點知就㩒錯掣傳咗畀傳媒。好彩份文件本身冇乜機密性，如果係錯手誤傳咗中央同佢哋秘密談判嘅內容就大鑊囉！
其實該黨出現呢類手民之誤都唔係第一次㗎啦。早排討論政改嘅時候，該黨職員就曾經將用嚟提醒議員出席特別黨團會議嘅手機短訊，誤發畀傳媒。難怪該黨議員李永達日前要鄭重提醒班黨友惡補資訊科技啦！