政情：長毛補選 成萬蚊泊車
立法會補選埋單計數，根據社民連議員長毛梁國雄開列嘅開支清單，喺補選期間，佢泊車都用咗成萬蚊，但亦畀交通警罰咗千六蚊，唔知佢係衰衝燈、超速定係亂咁泊車嘞，佢仲有個競選助理因工受傷，要claim醫藥費。
長毛被問及佢林林總總嘅開支，佢話喺競選期間非常之忙，所以到依家都唔知佢邊個助理因咩事受傷，嗰位助理知道佢老細咁冇心肝，唔知會點諗呢？長毛又話，拉票要緊，當時成日泊低架車就去做嘢，泊車費加埋違例泊車罰款，萬零蚊都差唔多喎。
向來予人剛強形象嘅公民黨梁家傑，原來暗地裏亦都非常貪靚，落區前都要去便利店買番支防曬打底，盛惠七十蚊。不過數到最經典嘅，都莫過於係大專二○一二嘅黃永志。選舉過後嘅慶功宴就係家常便飯，人人都有，但黃永志竟然用一百五十蚊搞咗個生日會，仲擺埋入競選開支入面，究竟生日會同選舉有乜嘢關係呢？