政情：大輝見京官解領呔開飯
盛夏時節烈日當空，男士為咗禮儀仲要着晒成套西裝兼打埋呔，真係苦不堪言。不過，正在北京訪問嘅香港中華廠商會成員有意外驚喜，隨團嘅廠商會立法會議員林大輝話，佢哋同京官會晤時個個梗係着晒西裝，但一坐到飯桌前，男士們眼神一接觸，大家就好有默契咁除呔食飯，齊齊支持環保咁話。
有晒默契 支持環保
廠商會訪京團尋日繼續第三日行程，擔任副團長嘅大輝話，今次行程緊湊，冇乜機會出去玩。雖然北京呢兩日落雨，氣溫冇上星期日攝氏四十度咁難頂，但都好高溫，男人着住老西一樣咁難受。
不過，佢發現京官處事果然有彈性。呢兩日佢哋分別同中央統戰部等多個部委食飯，就算領導人喺會晤嘅時候幾咁正經都好，一到咗食飯時就會變成另一個樣。
佢笑謂男士們一坐到餐枱前，唔使經過討論，大家打個眼色，就一個二個開始除呔，場面勁搞笑。佢認為天氣濕熱嘅香港可以大力推廣，環保啲嘛！