政情：民協亂抽水 貼街招邀功

阿基張街招上面仲寫住，民協經過多年努力同把握政改嘅機會，成功爭取港府喺十月進行政改本地立法嘅時候，提出取消區議會委任制建議，而民協亦會爭取一次過取消。此外，街招亦解構咗民協由今年二月至六月，向政府爭取取消區會委任制嘅歷程，細閱之下，呢段歷程認真峰迴路轉。

不過留意政改動態嘅人都知道，喺政改過程中，焦點大部分時間都去咗同中央談判嘅民主黨身上，雖則民協都有份入中聯辦同副主任李剛會面，但當時民主黨有九位立法會議員，民協就得一個，試問又有幾多人留意呢？再者提出取消區議會委任制亦唔係民協一家嘅專利，所以民協呢次「成功爭取」，亦含有好濃烈嘅「成功抽水」意味。

網民留言斥厚顏

尋日阿基同署理政務司司長林D9林瑞麟見面，傾吓本地立法嘅問題，佢喺會面之後繼續對取消區議會委任制問題鍥而不捨。佢話佢喺席上向林D9講明，一旦港府唔肯一次過取消的話，民協就積極考慮提出司法覆核，質疑委任區議員同民選區議員選舉權不平等嘅問題。咁即係話，取消區議會委任議員仍然係爭取中，又何來「成功爭取」呢？

有街坊（可能係對手啩）對於民協嘅所作所為睇唔過眼，係交友網站facebook上留言，指民協「厚顏到如此地步」，聞說佢哋遲啲仲會喺區內派發單張，批判民協。政黨或者政治人物嘅一舉一動，各方都到實，如果亂咁邀功，畀人揭發，就有蝕冇賺嘞，民協咁有政治經驗，點解咁都唔明？