滙豐銀行亞太區行政總裁王冬勝（Peter）夠晒威，有佢簽名嘅銀紙周街都係，滙豐嚟緊發行嘅新版銀紙又係佢簽名。Peter喺滙豐執董任內喺銀紙上簽名，今次已經係第二次。
第一次係滙豐○三年版本銀紙，雖然佢○五年至過檔滙豐，但之後加印嘅滙豐○三年版本全由佢簽署。渣打嘅銀紙都有佢簽名，皆因Peter之前係渣打大中華區主席，有佢簽名嘅○三年版本渣打紙鈔依然流通緊，係佢最早喺銀紙上簽名，卓妮銀包裏面就有一張嘞！
