中環耳目：方太食貫中西仍愛寧波家鄉菜
家鄉菜永遠最迷人，喺上海出生，香港長大，美國讀書嘅新世界中國地產執行董事方承光太太商蕾，雖然食貫中西，不過最回味嘅都係家鄉寧波嘅菜式。方太話喺香港想食寧波菜時，最精緻嘅都係寧波旅港同鄉會，因為呢度嘅產品最有家鄉味道。
方太最愛食寧波同鄉會嘅炒年糕，唔好睇方太十指纖纖，原來佢都會入廚煮番幾味，炒年糕當然亦難佢唔到，佢話炒年糕最緊要炒得夠煙韌，所以火候嘅控制好緊要，呢方面同鄉會就做得好好。其他菜式，好似臭豆腐咁，亦一樣食到老饕直豎拇指。
外表年輕嘅方太，睇唔出有一個已經讀緊中四嘅囝囝，方太話感謝父母嘅好遺傳，事關寧波人普遍都有靚皮膚。嚟緊方太諗住開個人畫展，事關佢讀美術出身，之後轉讀室內設計，咁多年嚟都係企喺客人嘅角度出發，無咩機會創作自己心中所想，所以佢有意用三年時間發揮小宇宙，依家仲開始積極畫畫添。