政情：大舊離場反閉門會議
立法會經濟事務委員會尋日突然要表決，決定是否接受油公司代表要求，將個會閉門舉行，議員嘥咗成半個鐘去討論表決呢個問題，仲有議員覺得油公司「大牌」，抗議離場，氣氛一度相當尷尬。
委員會尋日討論油公司應唔應該引入較低辛烷值汽油，根據立法會網站嘅開會通告，冇預告有油公司代表列席。殊不知一開會，主席林健鋒就話油公司代表可以列席，但擔心討論期間涉及價錢問題，要求閉門會議。個要求咁騎呢，即時惹來議員討論，當中以大舊陳偉業最激動：「冇理由油公司一句說話，唔公開就唔公開，好似要脅立法會！」他又質疑講汽油辛烷值，好難同價格掛鈎，為表不滿，抗議離場。
個閉門會最後四票贊成、兩票反對、兩票棄權開得成，但據悉無實質內容。事後主席林健鋒解釋，油公司最初回覆話唔出席會議，經佢再游說，對方上周答允出席，但要求閉門進行，秘書處試過致電問委員意見，又冇人回覆，惟有焗住喺會上處理，終於就搞到咁尷尬。