政情：郭家麒否認為選舉入黨
前任立法會醫學界代表郭家麒自從喺○八年立法會選舉中敗於梁家騮手中之後，成個人低調咗好多。佢深明自己一個人勢孤力弱，決定加入公民黨，但就唔認係為咗選舉。
郭家麒尋日喺公民黨主席關信基、黨魁余若薇同秘書長陳家洛陪同下，喺公民黨總部同傳媒打招呼。佢話自○六年公民黨創黨以嚟，都無話諗過要入黨，喺直到上個立法會表決政改後，眼見理性、溫和地爭取真普選嘅人始終喺少數，所以希望將微小嘅力量聚埋一齊喎﹗仲話佢係退出終極普選聯盟在先，政改表決後先考慮入黨問題。
今次郭家麒入黨，佢實牙實齒話唔會諗選舉嘅嘢住，無論係明年區議會選舉，抑或二○一二年立法會選舉都好，佢都堅持依家時間尚早，話選舉嘅嘢黨內有機制㗎喎。政治從來無免費午餐，郭家麒入黨將要負責醫療、規劃同環保等政策，仲要幫手落區，至於佢可以攞番啲乜，大家咪拭目以待囉！