政情：青年政策考起許曉暉
福建社團聯會青年委員會早兩日搞咗個座談會，請嚟民政事務局副局長許曉暉同青年協會總幹事做主講嘉賓，談談香港持續發展方向。作為主持人嘅菁英會副主席洪為民喺座談會上提出一條青年人政策嘅問題，點知考起在場嘅許副局。
近期「八十後」、「九十後」嘅問題，成為社會熱話，洪為民問兩位嘉賓點睇政府嘅青年政策。青協總幹事就話，青年政策一定係跨部門，非單一部門能解決，事關涉獵教育、醫療、住房等各方面問題。佢批評政府一直以為青年政策係社工嘅事，係攞福利，到近年要搞國民教育，才認識到青年政策嘅重要，可惜政府數以百計諮詢委員會老化，更重要係住房問題，依家年輕人即使捱十年，都未必買得起樓，令到佢哋做人冇晒期盼。
佢仲即場將個波拋畀許副局，話政府政策要問許副局。不過，許副局就話，即使解決咗住房問題，仲有好多問題要解決。佢不斷重複話政府好重視同年輕人溝通，每兩年搞一次青年高峰會，不時有交流會，依家仲進步到識用社交網站同大家傾偈，似乎答咗等於無答，間接畀洪為民考起。不過，青年政策涉獵咁廣，許副局一個人又點會答得到呀！