政情：有「味」西瓜感動肥亨
香港人情味愈來愈淡薄，但尋日中策集團主席馬時亨就過咗難忘嘅一日，因為佢收咗一個重達十四、五磅嘅西瓜禮物。
雜貨舖生意好 歸功《東方》
個新疆有核紅肉西瓜原來係上環「中國龍」雜貨舖老闆娘黃太親自揹來送畀肥亨，答謝佢早前幫襯買煨番薯時被本報發現，事關消息見報翌日中國龍生意暴增三倍！肥亨謙稱，全靠《東方日報》嘅威力，唔關佢事。
有心有力嘅黃太上星期親自登門送西瓜時，肥亨唔喺寫字樓，佢收到秘書告知嘅電話時，覺得好愕然，仲好感動，感受到香港人嘅人情味！原本佢想等中策集團副主席柯清輝一齊分享，但柯生忙於做空中飛人，所以肥亨尋日就喺灣仔華潤大廈中策嘅寫字樓舉行劏瓜儀式，請成班同事享用消暑。
個新疆西瓜清甜多汁，仲起晒沙，絕對係瓜中極品。肥亨一邊歎西瓜一邊感嘆話，呢個西瓜有一種味道係任何西瓜都冇嘅，就係人情味啦！