政情：邱副擺官威唔聽發叔電話
副局長同政治助理嘅中期評核報告快將公諸於世，呢班政治新丁嘅表現再度惹人關注。記得兩年前，擴大問責制上場之初，運輸及房屋局副局長邱誠武因為唔覆的士司機「大佬」電話，釀成一場的士堵塞交通風波。兩年後，邱副似乎無吸取慘痛教訓喎，尋日佢本來約好菜園村村民同「新界王」劉皇發開三方會議，但竟然臨時「甩底」，電話又係打唔通，被村民狠批擺官威。
事緣上星期六，村民本來要求邱副落村開街坊會議，向村民講解申領復耕牌嘅審批標準，等村民有據可依，準備申請資料，但邱副唔肯，又要勞煩發叔出馬。尋日朝早十點鐘，發叔打電話搵邱副，邱副終於應承見村民，約好下午二點半喺元朗高鐵資源中心見，發叔喺立法會有會都唔去開，準備入元朗。
唔齊人拒赴約 思維僵化
不過，代表村民同政府斡旋嘅菜園村支援組成員葉寶琳話，呢個遲來嘅會議最終都無開到。葉寶琳話，尋日下午一點四十分，邱副同佢通電話，要求佢確認菜園村七戶有機會獲復耕牌嘅家庭全部出席會議，否則會議告吹，仲叫葉十五分鐘之後打電話覆佢，但係葉寶琳其後一直打唔通邱副嘅電話，搵唔到邱副，佢話當時連發叔都搵唔到佢，成班村民喺元朗一直由兩點半等到三點半，直到發叔出現，先知道邱副因見七戶未齊人，所以唔肯嚟見大家。村民都好激氣，直斥邱副唔嚟都應該通知聲，唔使大家呆等一粒鐘吖！
葉寶琳話，對邱副嘅態度i晒頭，唔明佢點解咁鍾意「甩底」，又鍾意唔接電話，邱副擺咁大嘅官威，係咪想留難村民？
我哋下午六點幾透過運房屋新聞官搵邱副求證葉寶琳嘅說話，直到晚上十時許，邱副回覆本報解釋，出席會議本來係想見嗰七戶家庭，但據佢所知，七戶家庭唔會全部現身，所以就唔出席嘞；仲話中午同葉寶琳傾完電話之後，再無收過葉嘅電話，亦收唔到留言咁話喎。不過邱副都唔係第一次聽唔到電話喇！
今次菜園村村民同邱副霎氣，身為中間人嘅發叔亦被捲入其中，呢個中間人認真難做。發叔話，自己係鄉議局主席，有責任幫村民爭取利益，所以希望大家傾得掂，平息爭拗，令社會和諧，但佢都話，唔明點解邱副成日唔聽電話，又要求村民齊人先至赴約，思維僵化，就連邱副老細個老細煲呔曾，都唔敢話要六十個議員齊晒人，先至出席答問大會啦！