中環耳目：微笑行動黑衣女絕迹
平時去Ball場，各方名媛靚太都愛以黑色cocktail dress做戰衣，不過上周末「微笑行動」舉行慈善晚宴，黑衣人卻幾乎絕迹。原來呢晚嘅dress code係rainbow colour，難怪人人都着得咁色彩繽紛啦！
太子珠寶鐘錶主席鄧鉅明同太太鄧宣宏雁都拍拖出席晚宴。原來佢哋買咗兩張枱支持之餘，仲攞咗隻Franck Muller鑽錶出嚟拍賣做善事。鄧太以磚紅色連身裙出席，性感欠奉，令手上過百萬嘅伯爵鑽錶更加突出。啱啱去完日本旅行嘅鄧太，因為自己組團，行程相當輕鬆，加上見囝囝玩得好開心，令佢都樂而忘返。
平時鍾意着沉色衫嘅金刀梁梁智鴻太太馮令儀，當晚就以黃色低胸長裙配同色系clutch同高踭鞋現身。梁太話佢個衣櫃差唔多清一色係深色衫，為咗今次個Ball，佢摷晒成個衣櫃嘅衫出嚟，好彩有兩件鮮色衫，最後揀咗呢條黃色晚裝裙做戰衣，仲戴咗粒水頭充足嘅玉墜配襯。
嚟緊梁太會陪金刀梁去英國攞英國皇家醫學院頒發嘅內科榮譽院士，不過金刀梁話手停口停，前後去三日就返嚟，反而梁太就會留多幾日，陪吓喺嗰邊工作嘅愛女。