中環出更：王冬勝放暑假享天倫
咪睇滙豐亞太區行政總裁王冬勝（Peter）平時喺金融市場呼風喚雨，講起一對寶貝子女，佢就成個慈父樣出晒嚟。早兩日佢一連趕咗三場酒會，忙到連飲水嘅時間都冇，卓妮忍唔住問佢幾時放暑假抖吓氣，佢一聽到放假就即時放慢腳步，笑謂囝囝就嚟返美國開學，佢哋全家人會陪佢一齊去，順便放兩個星期假，仲話去邊度玩唔緊要，最重要係一家人開開心心喺埋一齊！
Peter有一仔一女，講起一對心肝寶貝，佢就成副冧樣。佢話囝囝喺加州讀緊大學，依家已高過佢兩吋；囡囡仲喺香港讀書，明年都應該出去讀大學㗎啦！Peter高大靚仔，一向被形容為「銀行界梁朝偉」，有佢咁好嘅遺傳，相信囝囝實英氣逼人啫！
Peter一向好重視家庭，經常趁暑假安排全家去唔同嘅地方旅行，有時仲會遊吓船河，享受天倫樂。咁又係嘅，平時Peter早出晚歸，除咗打理銀行業務，仲要做滙豐生招牌，出席無數畀面派對，同家人喺埋一齊嘅時間唔多，實要好好把握一年一度嘅悠長假期啦！
卓妮