中環出更：愛妻佗虎B 楊哲安呵護備至
教育局政治助理楊哲安（Jeremy）同明星太太張燊悅去年誕下女兒後，轉頭就追多一名，兩公婆仲好恩愛，早前一個夜晚，卓妮撞見佢哋拍拖行街，佗住八個月身孕嘅張燊悅睇嚟精神唔錯，卓妮見佢件衫胸前印咗隻生猛嘅老虎圖案，好似想話畀全世界聽，佢腹中塊肉都係隻老虎BB！
當晚佢哋兩公婆沿中環威靈頓街漫步行向置地廣場，素顏打扮嘅張燊悅睇嚟重咗二十磅左右，小背心下難掩一雙「肉臂」。Jeremy就摺起衫袖行街，似乎係啱啱收工。威靈頓街條斜路有啲暗斜，Jeremy怕太太辛苦，主動拎手袋，兩人邊散步邊閒話家常，夠晒sweet。
張燊悅唔緊張身材
尋日卓妮致電Jeremy，恭喜佢咁快就三年抱兩。佢好開心咁話多謝！咁呢胎係囝囝定囡囡？佢難掩愉快心情話，佢哋已經知道答案，但唔話畀卓妮聽！講開又講，Jeremy個大女啱啱一歲幾，學緊講嘢，佢話自己同太太就學緊點樣做家長。至於將來仲追唔追多個，就要視乎BB出世後，佢負唔負擔得起喎。
Jeremy真係識講笑，政助份人工十幾萬元，又點會負擔唔起？何況兩個寶貝孫將來仲有爺爺全國政協委員楊孝華做後盾呢？有邊個爺爺唔鍾意兒孫滿堂呀！Jeremy聞言趁機將個波踢畀哥哥楊哲寧，話唔可以靠晒佢，仲有哥哥哩！不過早前張燊悅出席楊哲寧鞋舖開幕禮時，就話生完呢胎後唔排除再生，人多熱鬧啲喎！
不過，卓妮見張燊悅件衫好貼身，暴露晒孕婦嘅「特點」，忍唔住叫Jeremy幫太太添置幾件孕婦裝。點知Jeremy話，太太緊張BB健康多過自己嘅身材，仲賣口乖話，老公覺得佢靚咪得囉！即係佢覺得太太靚咪得囉。
卓妮