自由黨前主席田北俊靜極思動，諗緊搞一個基金為基層紓困。田少雖然攤晒條數出嚟同政府算帳，但商界等唔切，有人搵佢做中間人，向大、小公司敲門募捐，大有大捐，細有細捐，啲錢要直接落喺有需要嘅人身上，唔可以百幾二百萬年薪請個行政總裁。
田少尋日上電台爆料，話舊年有人提出五區總辭，眼見社會出現分化同不滿，有工商界、地產商提出成立慈善基金，幫啲有需要嘅人，希望年底前搞得成。佢唔肯講邊啲人有份畀錢，只係舉例話，幾萬白內障老人家要等三至四年至可以做手術，其實每人幾千至一萬蚊，商界可以搞掂，希望拋磚引玉。
佢同政府算帳，話外匯基金由當年六千幾億增加到依家嘅二萬二千億，每年政府使三千億，使七年都唔使未雨綢繆，米倉都唔使再儲多啲米，淨係投資有百分之五嘅回報都有一千億啦，用喺弱勢社群身上，利益大到不得了。
田少話特區政府成日嚇市民，話派糖就要加稅。佢叫政府唔好再狼來了：「中環係現代城市，野狗都唔見多隻啦！」
