聽日就係七一遊行，搞手民陣為抗議民主黨「轉軚」，臨時加咗「堅持二○一二雙普選、廢除功能組別」做遊行主題，當堂令一班打算去遊行、但又喺政改上投咗贊成票嘅泛民成員好尷尬。我哋尋日喺社交網站facebook發現民陣廣邀各界參加遊行，唔少泛民成員都話會參加，不過民主黨議員李永達（高達）、民協議員KK馮檢基竟然揀咗「拒絕出席」，唔通佢哋打算同民陣「一刀兩斷」？
非也，我哋即刻打畀高達同KK，發現只係誤會一場。佢哋不約而同咁話，所用嘅facebook帳戶會有職員管理雜務，佢哋只會親自回覆網民留言及意見。為咗令管理比較有效率，高達同KK都吩咐職員，全部拒絕facebook內所有邀請佢哋嘅群組同活動，結果就搞出呢個小風波。
事後高達即刻喺facebook澄清，話聽日佢一定會行足全程。KK就話，網上世界疑幻似真，唔會特別去更正，認識佢為人嘅，自然會知道聽日一定喺維園見到佢，唔會將呢啲小事放喺心上。