政情：李嘉誠汕大主禮撐環保
長實集團主席李嘉誠尋日現身汕頭大學，為汕大圖書館展示裝置藝術品「聆聽大地的聲音」主持開幕儀式，提醒大家關注物種滅絕同埋棲息地減少嘅危機。誠哥親自出動撐環保，身為活動推動者嘅華裔建築師林瓔（Maya）最開心啦！
Maya話，「聆聽大地的聲音」係第一次到中國展出，汕大係首站，跟住會由南向北喺內地八個城市巡迴展覽，歷時六個月，明年就會展開第二階段展覽，深入內地東北同埋中西部等城市。咁大陣仗嘅活動，少啲財力人力都唔掂，所以佢好感激李嘉誠基金會嘅支持，將呢個裝置藝術帶到中國。汕大師生將跟隨巡展四圍去，期間又會同環保團體見面，與公眾分享關注環境嘅議題。
Maya係著名華裔建築師，佢嘅設計才華早喺美國耶魯大學就讀時已嶄露頭角。中國近代史嘅知名才女兼建築師林徽音係佢嘅姑媽，呢段出身令華人對Maya倍感親切。