政情：C18開檔政壇紅人到賀
由廠商會立法會議員林大輝牽頭、醞釀咗逾一年嘅地區組織C18（社區18）尋日終於正式成立，無論政界定工商界嘅各路英雄都嚟賀一賀大輝，連中聯辦副主任周俊明、基本法委員會副主任梁愛詩、全國政協常委陳永棋、醫管局主席胡定旭同鄉議局主席劉皇發都畀面出席，可謂星光熠熠。
大輝話就話想藉C18團結區議員嘅力量，搞多啲地區事務，但唔少人都質疑C18只係一個幫佢老友唐唐嘅「組織」。「受益人」唐唐尋日就有意無意去咗四川，但佢爸爸唐翔千同媽媽唐尤淑圻送咗個花籃去。C18係咪真係一個社區組織咁簡單，就要睇落去先知喇！
建築工示威贈「慶」
C18吸納咗來自十四區嘅三十四位區議員，除咗陳茂波，五散人嘅陳健波、譚偉豪、梁家騮以及廠商會黃友嘉都做咗顧問。作為C18召集人嘅大輝，尋日特別揀咗林大輝中學作為典禮地點，借勢晒吓佢間直資中學。除咗一班區議員外，各黨派亦有派人到場支持，工聯會黃國健一見到大輝仲祝佢大展鴻圖，喺下次超級區議會發力，搞到大輝鬼咁尷尬，叫佢唔好講呢啲住喎。
政府高官亦好畀面，十二局中有近十個局嘅副局或政助去咗。不過講到最矚目嘅，莫過於基本法委員會副主任梁愛詩嘞。之但係詩姐尋日就非常口密，乜都唔肯講，問到佢C18係咪為唐唐組班，佢就爆咗句：「喺呢度咁多人，你呢啲都可以問到我？」政協常委陳永棋亦都對「組班」呢樣嘢不置可否，話自己咩都唔知喎。
大輝尋日就承認佢同唐唐嘅「密切關係」，話好明白大家會有咁嘅想法，但強調C18唔係任何政黨政團，主力關注民生議題，甚少講政治，所以將兩件事咁掛鈎唔多啱喎。佢又話，如果為咗一個人而去成立組織，係冇可能，亦都唔長久，真係信不信由你。
同場仲有段小插曲。話說有班建築工人喺典禮前嚟到林大輝中學門外示威，抗議大輝欠薪。據聞大輝事前已經答應同佢哋喺下個月坐低慢慢傾，叫佢哋唔好嚟踩場。之但係班工人就覺得大輝反咗口幾次，唔再信佢，堅持嚟抗議。大輝對此好無奈，話影響到學校同學生覺得「好痛心」，仲話自己尊重法治，接受法庭嘅裁決，但承諾一定會處理好件事。有人攞景，有人贈興，尋日嘅場面都幾熱鬧！