中環耳目：莊友堅推介灘萬牛肉飯
馬主兼股壇名人莊友堅（Eugene）最識享受人生，玩車、養馬、炒股樣樣齊，佢對食嘢嘅要求都好高，所以喺公司闢咗幾千呎做私人飯堂，專門招呼員工同埋股票客戶。佢話自己食嘢鍾意清淡，每周必定幫襯港島香格里拉酒店嘅日本餐廳灘萬（Nadaman），必食之選係牛肉香味燒客飯。
Eugene勁讚灘萬嘅環境乾淨，食物質素一流，招呼都唔錯；如果係佢哋識得嘅客人，招呼更加貼心，畀到佢賓至如歸嘅感覺。佢每個星期梗會嚟一次，有時係自己嚟食，有時係朋友請食飯，可見佢嘅朋友圈中人都覺得呢度值得推介。
秘製燒醬汁
Eugene盛讚嘅牛肉香味燒客飯，令人齒頰留香嘅秘密係特製嘅燒醬汁。廚師首先用洋葱伴炒牛肉，再佐以秘製醬汁，最後灑啲芝麻，味道一流。
Eugene話呢個午餐勝在簡簡單單，如果覺得唔夠飽，佢會加少少炸雞同埋壽司，咁就正晒啦！